बन्चरो प्रहारबाट बनकट्टामा आफ्नै श्रीमतीको हत्या

चन्द्रौटा, १२ कात्तिक । श्रीमानको बन्चरो प्रहारबाट कपिलवस्तुमा एक महिलाको मृत्यु भएको छ । मृत्यु हुनेमा शिवराज नगरपालिका १, बनकट्टा (तकदीरनगर) बस्ने वर्ष ३५ की सुमित्रा परियार रहेकी छन् । राति घरमा सुतिरहेको बेला बन्चरो प्रहार गरी ४० वर्षे बसन्त परियारले आफ्नै श्रीमतीको हत्या गरेका हुन् ।

आइतबार राति करीब ११ बजेको समयमा घरभित्र भुईंमा विस्तरा लगाएका छोराछोरी सहित सबै सुतिरहेको बेला बसन्तले राति उठेर श्रीमतीको टाउकोमा बन्चरो प्रहार गरेका थिए । बन्चरो प्रहारबाट सुमित्रा परियारको घटनास्थलमै मृत्यु भएको पारिवारिक स्रोतले जानकारी दिएका छन् ।

बन्चरो प्रहारपछि बसन्त फरार भएको बताइएको छ । रगतले कपडा भिजेपछि बल्ल आफूहरुले थाहा पाएको छोरी बुनुले बताइन् । रुन कराउन थालेपछि अंकल अन्टी आएर गाउँघरमा हल्ला गरेको छोरा सुजनको भनाई छ ।

स्थानीयले खबर गरेपछि वडा प्रहरी कार्यालय चन्द्रौटाको टोली राति नै घटनास्थल पुगेको थियो । मृतक सुमित्राको शव राति नै प्रहरीले पोष्टमार्टमका लागि बहादुरगञ्ज अस्पताल पठाएको बताएको छ । श्रीमतीको हत्या गरी फरार भएका बसन्त परियारको खोज अनुसन्धान गरिरहेको प्रहरीले जनाएको छ ।



दाङको राप्ती गाउँपालिका बडाडाँडाबाट पाँच वर्षअघि बसाई सरेका उनीहरु मिहिनेत मजदुरी गरी जीविकोपार्जन गर्दै आएका थिए । यसअघि पनि बाहिर काममा गएको बेला श्रीमतीलाई हानेर टाँका लगाउनुपरेको छोरा सुजनले बताए । ४/५ दिनअघि घरबाट निस्केको बसन्त आइतबार मात्र घर फर्केको बुवा जितबहादुर परियारले बताएका छन् । ‘आएको राति नै आफ्नै श्रीमतीलाई मा-यो’, दुःखी हुँदै उनले भने ।

बसन्तको जेठो छोरा अशोक १६ वर्षका छन् । उनी कामको सिलसिलामा बाहिर छन् । अर्का छोरा सुजन १२ वर्षका भए । उनी नेपाल आदर्श मावि शिवपुर कक्षा ३ मा पढ्छन् । छोरी १० वर्षीय बुनु परियार अहिले नेपाल आदर्श मावि कक्षा २ मा पढ्दै आएकी छन् । घटनापछि अहिले छोराछोरी विचल्लीमा परेका छन् ।